Muqdisho (Dawan)– Guddiga Madaxa-bannaan ee Doorashooyinka iyo Xuduudaha Soomaaliya ayaa maanta oo Jimco ah ugu baaqay ururrada siyaasadda ee ku tartamaya doorashada goleyaasha deegaanka ee Dowlad-goboleedka Galmudug inay si buuxda ugu hoggaansamaan qoondada haweenka ee uu sharcigu dhigayo marka ay soo gudbinayaan liisaska musharraxiinta.
War degdeg ah oo uu soo saaray guddiga ayaa lagu sheegay in haweenku ay noqdaan ugu yaraan 30% tirada guud ee musharraxiinta u tartamaya kuraasta goleyaasha deegaanka, si loo xaqiijiyo matalaad waafaqsan shuruudaha sharciga doorashooyinka.
Guddiga ayaa xusay in mas’uuliyadda hubinta in liisaska musharraxiintu ay waafaqsan yihiin qodobbada sharciga doorashooyinka ay saaran tahay ururrada siyaasadda ka hor inta aan liisaska loo soo gudbin guddiga si loo ansixiyo.
Waxa kale oo uu guddigu sheegay inuu dib u eegi doono liisaska musharraxiinta, isla markaana xaqiijin doono in qoondada haweenka si buuxda loo hirgeliyey, taas oo uu ku tilmaamay waajibaad sharciyeed oo ka mid ah doorkiisa kormeerka hannaanka doorashooyinka.
