Yurub oo bogaadisay doorashadii Itoobiya

Addis Ababa (Dawan) – Midowga Yurub ayaa soo dhaweeyay hannaanki ay u qabsoontay doorashadii 7-aad ee Itoobiya, isaga oo ku tilmaamay codbixintii dhacday 1-da Juun tallaabo muhiim ah oo lagu xoojinayo hannaanka dimuqraadiyadda dalka.

Bayaan wadajir ah oo maanta oo Arbaca ah ay soo saareen Ergada Midowga Yurub ee Itoobiya iyo safaaradaha dalalka Canada, Norway iyo Switzerland, ayaa lagu ammaanay hay’adaha iyo dhinacyada ka qeyb qaatay diyaarinta iyo hirgelinta doorashada.

“Ergada Midowga Yurub ee Itoobiya iyo safaaradaha dalalka xubnaha ka ah Midowga Yurub waxay soo dhaweynayaan qabsoomidda doorashadii 7-aad ee Itoobiya ee dhacday 1-da Juun 2026,” ayaa lagu yiri bayaanka.

Doorashadan ayaa dhacday iyadoo in ka badan 54 milyan oo qof oo isdiiwaangeliyay ay xaq u lahaayeen inay codkooda dhiibtaan si ay u doortaan xubnaha baarlamaanka federaalka iyo goleyaasha dowlad-goboleedyada dalka.

Dalalka reer Galbeedka ayaa sidoo kale bogaadiyay dadaallada ay sameeyeen Guddiga Doorashooyinka Qaranka Itoobiya, howlwadeenada doorashada, xisbiyada siyaasadda, musharraxiinta iyo ururrada bulshada rayidka ah ee ka qeyb qaatay geeddi-socodka doorashada.

Bayaanka waxaa si wadajir ah u saxiixay Midowga Yurub iyo safaaradaha Austria, Belgium, Bulgaria, Czech Republic, Denmark, Finland, France, Germany, Greece, Hungary, Ireland, Italy, Luxembourg, Malta, Netherlands, Poland, Portugal, Romania, Slovakia, Slovenia, Spain iyo Sweden, iyo sidoo kale Canada, Norway iyo Switzerland.

Dalalkan ayaa sidoo kale carrabka ku adkeeyay muhiimadda ay leedahay kormeerka doorashooyinka si loo xoojiyo kalsoonida lagu qabo hannaanka dimuqraadiyadeed, iyagoo sheegay inay sugayaan warbixinnada rasmiga ah ee ka soo baxaya kooxaha kormeerka doorashada.

“Anagoo aqoonsan doorka muhiimka ah ee Midowga Afrika iyo IGAD ay ka qaateen kormeerka doorashada, waxaan sugaynaa warbixinnadooda,” ayaa lagu yiri bayaanka.

Howlgalka kormeerka doorashada ee Midowga Afrika oo uu hoggaaminayo Madaxweynihii hore ee Kenya, Uhuru Kenyatta, iyo ergada IGAD ayaa ahaa kooxihii la socday habsami u socodka codbixinta maalintii doorashada.

Uhuru Kenyatta ayaa horay u sheegay in marxaladihii hore ee codbixintu ay u dhaceen si nidaamsan oo degan, isagoo muujiyay rajada ah in geeddi-socodku si nabad ah ku dhammaado.

Bayaan-ka Midowga Yurub ayaa sidoo kale xusay deegaanno aan doorashooyinka ka qabsoomin sababo kala duwan awgood, iyadoo la muujiyay rajada ah in bulshada ku nool goobahaas la siiyo fursad ay codkooda ku dhiibtaan.

“Waxaan rajeyneynaa in dhammaan deegaanadii aan doorashadu ka dhicin 1-da Juun la siiyo fursad ay uga qeyb qaataan geeddi-socodka doorashada,” ayaa lagu yiri bayaanka.

Qaar ka mid ah degmooyinka gobolka Amxaarada ayaan doorashada ka qabsoomin sababo la xiriira xaalado amni, halka gobolka Tigray-na aysan doorashadu ka dhicin iyadoo ay weli ka taagan yihiin caqabado siyaasadeed iyo maamul oo ka dhashay colaaddii sannadkii 2022.

Doorashadan ayaa si dhow loola socdaa maadaama Itoobiya ay tahay dalka labaad ee ugu dadka badan Afrika isla markaana door muhiim ah ku leh Geeska Afrika.

Iyadoo tirinta iyo xaqiijinta codadka ay weli socdaan, indhaha ayaa hadda ku sii jeeda warbixinnada kooxaha kormeerka iyo natiijooyinka kama dambaysta ah ee doorashada, kuwaas oo la filayo inay saameyn ku yeeshaan jihada siyaasadeed ee Itoobiya sannadaha soo socda.

Doorashada Itoobiya ayaa loo arkaa mid ka mid ah dhacdooyinka siyaasadeed ee ugu muhiimsan qaaradda Afrika sannadkan, iyadoo saameynteedu ay gaari karto xasilloonida iyo maamulka guud ee gobolka Geeska Afrika.