Booliiska Jabuuti oo qabtay nin lagu eedeyay inuu hogaamiye u ahaa koox burcad ah

Jabuuti (Dawan) – Booliiska Qaranka Jabuuti ayaa gacanta ku dhigay nin lagu tilmaamay inuu yahay hoggaamiye burcad ah oo lagu eedeeyay afduub iyo jirdil uu u geystay bulshada, iyadoo boolisku sheegay inuu khatar ku ahaa amniga guud.

Eedeysanahan oo aysan boolisku shaacin magaciisa ayaa lagu soo qabtay howlgal lagu beegsanayay dambiyada abaabulan, sida ay sheegeen ilo amni.

Ninkan oo ay saraakiisha amnigu sheegeen inuu baxsad ahaa, ayaa la qabtay toddobaadkii hore, kadib markii ay ciidamada booliiska ee saldhigga degmada 1-aad ku guuleysteen inay joojiyaan dhaq-dhaqaaqiisa. Tani waxay qayb ka tahay dadaallada lagu xakameynayo dambiyada abaabulan, iyadoo shalay la soo bandhigay muuqaalkiisa.

Sida ay sheegeen baarayaashu, tuhmanaha ayaa laf-dhabar u ahaa baaritaan ballaaran oo la xiriira falal culus, oo ay ka mid yihiin afduub, xarig sharci-darro ah, jirdil iyo falal arxan darro ah. Waxaa sidoo kale lagu eedeeyay inuu ku lug lahaa tahriibinta iyo ka ganacsiga maandooriyaha.

Booliiska ayaa sheegay in ninka la qabtay uu qirtay dambiyada lagu soo eedeeyay intii uu ku jiray wareysiga baaritaanka, isagoo qirtay falalka loo haysto.

Kadib qabashadiisa, tuhmanaha ayaa la horgeeyay xeer-ilaalinta, halkaas oo lagu amray in lagu sii hayo xabsi ku meel gaar ah. Waxaa loo taxaabay xabsiga rayidka ee Gabode si loo sii wado dacwadiisa.