Garoowe (Dawan)— Madaxweynaha Puntland Siciid Cabdullaahi Deni ayaa sheegay in dane shisheeye ay ka dambeeyaan burcad-badeednimada Soomaaliya, isagoo ku eedeeyay qaar ka mid ah dalalka yimaada gobolka iyagoo sheegaya inay la dagaallamayaan burcad-badeednimada inay markii dambe raadsadaan danahooda gaarka ah ee biyaha Soomaaliya.
Deni oo Khamiistii ka hadlay magaalada dekedda ah ee Garacad ayaa sheegay in Puntland ay ka go’an tahay inay la dagaallanto burcad-badeednimada, isla markaana ay ilaaliso amniga iyo kheyraadka xeebaha.
Deni ayaa sheegay in burcad-badeednimadu ay khatar ku tahay amniga badda iyo horumarka dhaqaale ee gobolka, isagoo ololaha Puntland ee ka dhanka ah burcad-badeedda la barbardhigay dagaalladii hore ee lagula jiray kooxda Daacish iyo Al-Shabaab.
“Shabaab waan la dagaallamaynaa ayaan niri waana la dagaallannay. Daacish waan la dagaallamaynaa ayaan niri waana la dagaallannay. Hadda ogaada Burcaddana waan la dagaallamaynaa,” ayuu yiri Deni, isagoo ku baaqay in dowladda iyo bulshada deegaanka ay iska kaashadaan ilaalinta xeebaha.
Madaxweynaha Puntland ayaa sheegay in maamulku doonayo inuu abuuro jawi ay ganacsatada iyo maalgashadayaashu si ammaan ah uga shaqeyn karaan, isagoo xusay in amniga badda uu muhiim u yahay soo jiidashada maalgashiga iyo kobcinta dhaqdhaqaaqa dhaqaale.
Deni ayaa sidoo kale su’aal geliyay ujeeddooyinka dowladaha shisheeye ee ku lug leh dadaallada lagula dagaallamayo burcad-badeednimada ka jirta xeebaha Soomaaliya.
Wuxuu sheegay in qaar ka mid ah dalalka ay Puntland yimaadeen iyagoo ku andacoonaya inay la dagaallamayaan burcad-badeednimada, balse markii dambe ay isku dayeen inay danahooda ka fushadaan kheyraadka badda Soomaaliya.
Madaxweynaha ayaa sheegay in Puntland ay awood u leedahay inay si toos ah ula dagaallanto burcad-badeednimada, isla markaana ay mas’uuliyaddeeda tahay ilaalinta amniga xeebaha iyo kheyraadka badda.
Hadallada Deni ayaa ku soo beegmaya xilli burcad-badeednimadu ay mar kale noqotay walaac weyn oo dhinaca amniga badda ah oo ka jira biyaha Soomaaliya, kaddib sannado ay weerarradu aad u yaraayeen.
