Muqdisho (Dawan) — Hay’adda Caalamiga ah ee Horumarinta Beeraha (IFAD) ayaa magaalada Muqdisho ka daahfuraysa Barnaamijka Adkeynta Nolol-maalmeedka Reer Miyiga Soomaaliya (Rural Livelihoods Resilience Programme – RLRP), oo lagu maalgelinayo $31.22 milyan, si loo taageero bulshada reer miyiga ah, loo xoojiyo wax-soo-saarka beeraha, sugidda cuntada iyo horumarinta dhaqaalaha miyiga.
Sida uu sheegay Agaasimaha Gobolka ee IFAD u qaabilsan Bariga Dhexe, Waqooyiga Afrika, Yurub iyo Bartamaha Aasiya, Naoufel Telahigue, iskaashiga u dhexeeya IFAD iyo Soomaaliya ayaa si weyn u kobcay sannadihii u dambeeyay.
Telahigue ayaa xusay in maalgelinta IFAD ee Soomaaliya ay ka soo korortay $10 milyan ilaa in ka badan $100 milyan muddo dhowr sano ah.
Wuxuu tilmaamay in Soomaaliya ay ka gudubtay marxalad ay la tacaalaysay daymo dib u dhacay, isla markaana ay hadda noqotay dal ka qayb qaata maalgelinta IFAD, kadib markii ay ku biirtay dadaallada dib-u-buuxinta sanduuqa maalgelinta ee IFAD14.
“Waxaan aad ugu faraxsanahay in wax ka yar saddex sano ka hor Soomaaliya ay la tacaalaysay daymo, maanta se ay tahay dal taageera IFAD. Waxaan uga mahadcelinaynaa dowladda Soomaaliya iyo shacabka Soomaaliyeed kaalinta ay ka qaateen IFAD14,” ayuu yiri Telahigue.
