Addis Ababa (Dawan) – Itoobiya ayaa maanta oo Arbaco ah si rasmi ah u furtay Shirka Wadahadalka Qaran, iyadoo Ra’iisul Wasaaraha Abiy Axmed uu ku tilmaamay kulankan fursad taariikhi ah oo lagu xallin karo khilaafaadka siyaasadeed laguna dhisi karo nabad waarta.
Abiy Axmed ayaa khudbaddii furitaanka ku sheegay in shirka, oo la filayo inay toddobaadyada soo socda ka qaybgalaan ku dhowaad 4,000 oo ergo, uu Itoobiya siinayo fursad ay “ku qorto bog cusub” oo taariikhdeeda ah, iyadoo lagu beddelayo is-afgarad halkii uu ka jiri lahaa iska horimaad siyaasadeed.
“Waxaan taaganahay xilli aan jebin karno meertada siyaasadeed ee Itoobiya,Waa meerto ka bilaabata hadallo hurinaya colaadda kuna dhammaata rabshado, waxaana lagu beddeli karaa wada hadal iyo is-dhaafsi aragtiyo.” ayuu yiri Abiy Axmed.
Ra’iisul Wasaaraha Itoobiya ayaa sheegay in shirka lagu saleeyay hannaan ajande ururin ah oo ka soo bilowday bulshada, kaas oo ay ka qaybqaateen boqolaal kun oo muwaadiniin ah, isagoo ku tilmaamay mid ka mid ah wada-tashiyadii siyaasadeed ee ugu waaweynaa taariikhda casriga ah ee Itoobiya.
Abiy Axmed ayaa uga mahadceliyay xubnaha Guddiga Wadahadalka Qaran ee Itoobiya dadaalka ay ku bixiyeen diyaarinta iyo hirgelinta geeddi-socodkan, wuxuuna ugu baaqay ergooyinka inay ka hormariyaan danta qaranka danahooda gaarka ah si loo xaqiijiyo xasilloonida iyo midnimada dalka.
