Baydhabo (Dawan) — Guddiga Dib-u-heshiisiinta Koonfur Galbeed ayaa kulan la yeeshay odayaasha dhaqanka ee dowlad-goboleedka, iyagoo ka wada hadlay xaaladda deegaanka, colaadaha taagan iyo sidii loo heli lahaa xal nabadeed oo horseeda dib-u-heshiisiin iyo xasillooni.
Kulanka oo maanta ka dhacay magaalada Baydhabo ayaa diiradda lagu saaray xoojinta wada-hadalka, mideynta dadaallada nabadeed iyo sidii loo soo afjari lahaa colaadaha saameeyay deegaanka.
Guddiga iyo odayaasha dhaqanka ayaa isla gartay muhiimadda ay leedahay is-dhageysiga, tixgelinta talooyinka odayaasha dhaqanka iyo qaadashada tallaabooyin wax ku ool ah oo lagu xallinayo khilaafaadka jira. Sidoo kale, labada dhinac ayaa isku raacay in la xoojiyo wada-shaqeynta, si loo abuuro jawi nabdoon oo bulshada Koonfur Galbeed ay si nabad ah ugu wada noolaan karto, loona ilaaliyo wadajirka bulshada iyo xasilloonida deegaanka.
