Muqdisho (Dawan) – Madaxweynaha Soomaaliya Xasan Sheekh Maxamuud ayaa mar kale ku celiyay in dowladda federaalku aysan aqoonsanayn doorashadii ugu dambeysay ee ka dhacday Jubbaland.
Madaxweynaha ayaa sheegay in nidaamka doorasho ee hadda dalka laga hirgelinayo uu ka duwan yahay habkii loo maray doorashada Jubbaland.
Waxa uu sheegay in dowladda federaalku aysan aqoonsanayn natiijada doorashadaasi, isla markaana aysan u aqoonsanayn Axmed Maxamed Islaam Madoobe inuu ku yimid nidaamka doorasho ee dowladda taageersan tahay.
Wareysi uu Madaxweynaha siiyay barnaamijka Miisaan Podcast ee ka baxa Dawan ayuu ku sheegay in dowladda federaalku ay weli ku adkaysanayso mowqifkeeda ku aaddan doorashadii Jubbaland, iyadoo xalkeedana lagu raadinayo wada-hadal.
“Doorashadiisa ma aqoonsanin, mana aqoonsanin, mana aqoonsanin,” ayuu ku celceliyay madaxweynaha.
Xasan Sheekh ayaa sheegay in dowladda aysan dooneyn iska horimaad siyaasadeed ama mid amni, balse ay rabto in Jubbaland lagu soo celiyo nidaamka dastuuriga ah.