Garoowe (Dawan)— Wasiirka Gargaarka iyo Maaraynta Musiibooyinka Puntland, Cabdinasir Yuusuf Xaajiayaa dadka ku nool xeebaha waqooyi-bari Soomaaliya ugu baaqay inay feejignaadaan kadib markii dhulgariir cabbirkiisu yahay 6.0 uu ka dhacay meel ka baxsan xeebaha Gacanka Cadmeed, isagoo ku baaqay in si ku-meel-gaar ah loo hakiyo kalluumeysiga iyo hawlaha kale ee badda.
Dhulgariirka ayaa dhacay 21:07 UTC Agoosto 27, sida ay sheegtay Hay'adda Sahanka Juqraafiyeed ee Mareykanka (USGS), iyadoo xudduntiisu ahayd qiyaastii 145 km (90 mayl) waqooyi ka xigta Caluula, kuna qotontay 10 km.
Wasiirka Gargaarka iyo Maaraynta Musiibooyinka Puntland, Cabdinasir Yuusuf Xaaji, ayaa Jimcihii sheegay in dadka ku nool degmooyinka xeebaha, gaar ahaan gobollada Bari iyo Raas Caseyr, ay si dhow ula socdaan xaaladda isla markaana ay diyaar u ahaadaan saameyn kasta oo ka dhalan karta.
Wuxuu kalluumeysatada iyo dadka kale ee ka shaqeeya badda ugu baaqay inay si ku-meel-gaar ah u joojiyaan hawlahooda, isagoo sidoo kale ku baaqay in doomaha iyo qalabka kale ee badda laga soo saaro inta ay masuuliyiintu qiimeynayaan xaaladda.
Wasiirku wuxuu sidoo kale ugu baaqay maamullada degmooyinka iyo gobollada ku teedsan xeebaha inay farriinta digniinta ah gaarsiiyaan bulshada, isagoo hay'adaha dowladda iyo kuwa samafalka ugu baaqay inay diyaar u ahaadaan xaalad kasta oo ka dhalan karta.
Wuxuu sheegay in dowladda ay sii wadi doonto inay bulshada la wadaagto xogaha cusub ee la helo, wuxuuna dadka ugu baaqay inay la socdaan wararka rasmiga ah iyo warbaahinta.
