Muqdisho (Dawan)— Ra’iisul Wasaarihii hore ee Soomaaliya, Cabdi Faarax Shirdoon, ayaa Villa Soomaaliya ugu baaqay inay dib ugu soo laabato miiska wadahadalka, isla markaana la qabto doorasho loo dhan yahay oo laga heshiiyey, isagoo ka digay in khilaafaadka siyaasadeed ay horseedi karaan dagaallo sokeeye iyo colaad daba dheeraata.
Shirdoon ayaa sheegay in ay tahay in laga fogaado xaalad ay Villa Soomaaliya iyo qaybaha bulshada Soomaaliyeed isku dhacaan, isagoo ka digay cawaaqibka ka dhalan kara beegsiga siyaasadeed. Waxa uu tilmaamay in beegsiga noocaas ahi uu leeyahay taariikh xanuun badan, isla markaana uu abuuri karo colaado iyo aanooyin muddo dheer saamayn ku yeesha siyaasadda iyo xiriirka bulshada Soomaaliyeed.
“Beegsigu wuxuu leeyahay taariikh dhib badan oo fool xun. Waxaa ka dhasha dagaallo sokeeye, waxaa ka dhasha aanooyin mahadho ah oo muddo dheer siyaasadda iyo dadka Soomaaliyeed ku dhex jiri kara,” ayuu yiri Shirdoon.
