Soomaaliya oo cambaareysay weeraradii ay Iiraan ku qaadday dalal Carbeed

Soomaaliya, 1 Maarso 2026 (Dawan)– Dowladda Soomaaliya ayaa si kulul u cambaareysay waxa ay ku tilmaantay “weerarro iyo gardarro” ay Iiraan ku qaadday dhowr dal oo Carbeed, iyadoo ku sheegtay falal “xadgudub weyn ah oo muuqda” oo ka dhan ah madax-bannaanida dowladnimo.

Bayaan ka soo baxay Wasaaradda Arrimaha Dibadda maanta oo Axad ah ayaa lagu caddeeyay in Soomaaliya ay si buuxda u garab taagan tahay dalalka kala ah Sacuudi Carabiya, Qadar, Kuwayt, Urdun, Baxrayn iyo Cumaan. “Soomaaliya waxay taageeraysaa dhammaan tallaabooyinka ay qaadeen dalalka walaalaha ah, kuwaas oo ku saleysan xuquuqdooda sharci ee is-difaaca, dhowrista amnigooda iyo ilaalinta shucuubtooda,” ayay wasaaraddu ku tiri bayaanka.

Bayaanka ayaa sidoo kale lagu adkeeyay mowqifka adag ee Muqdisho ka taagan tahay ka hor imaanshaha adeegsiga xoogga iyo falalka hurinaya colaadaha.

Wasaaradda ayaa intaas ku dartay inay weli ka go’an tahay taageeridda dadaallada diblomaasiyadeed iyo xalinta nabadeed ee lagu dhameynayo iska horimaadyada gobolka, si loo xaqiijiyo nabadda iyo amniga caalamiga ah.

Hadalka Soomaaliya ayaa imaanaya xilli ay sii kordhayaan xiisadaha ka taagan Bariga Dhexe, kaddib markii Iiraan bilowday weerarro gantaallo iyo diyaarado aan duuliye lahayn ah oo lala beegsaday dalalka Khaliijka, kuwaas oo daba socday weerarro wadajir ah oo ay fuliyeen Maraykanka iyo Israa’iil oo lala beegsadIraxarumo muhiim ah oo ku yaal gudaha Iiraanran, taasoo sare u qaadday cabsi laga qabo xasilooni darro weyn oo ka dhacda gobolka.