Mauritania (Dawan)– Dowladda Soomaaliya ayaa Isniintii ku baaqday in la xoojiyo iskaashiga gobolka iyo kordhinta maalgashiga caafimaadka, iyadoo Wasiirka Caafimaadka, Dr. Cali Xaaji Aadan, uu ugu baaqay dalalka Afrika inay sii xoojiyaan iskaashiga si loo dhiso nidaamyo caafimaad oo adkeysi leh.
Khudbad uu ka jeediyay Madasha Gobolka ee Maalgashiga Caafimaadka oo ka dhacday magaalada Nouakchott ee dalka Mauritania, ayuu wasiirku ku sheegay in iskaashiga dhow ee u dhexeeya dalalka soo koraya, maalgelinta waarta iyo maalgashiga wax-soo-saarka dawooyinka gudaha ay yihiin arrimo muhiim u ah horumarinta adeegyada caafimaadka ee gobolka.
Madasha waxaa kasoo qeybgalay wasiirrada caafimaadka, hay'adaha caalamiga ah iyo bah-wadaagta horumarinta si ay uga wada hadlaan xoojinta nidaamyada caafimaadka, soo jiidashada maalgashiga iyo ballaarinta iskaashiga gobolka.
Intii uu ka qaybgalayay kulan wasiirro oo looga hadlayay iskaashiga dalalka Koonfurta (South-South Cooperation), ayuu Dr. Cali Xaaji Aadan soo bandhigay dadaallada Soomaaliya ay ku dib u dhisayso kuna horumarinayso nidaamkeeda caafimaadka kadib sannado ay saameeyeen colaado iyo maalgelin yari.
Wuxuu sheegay in iskaashiga gobolka uu door weyn ka qaadan doono ballaarinta helitaanka adeegyada caafimaadka, xoojinta amniga caafimaadka iyo hubinta in bulshada oo dhan ay hesho adeegyo caafimaad oo loo siman yahay.
Sidoo kale, wasiirku wuxuu ku baaqay in la kordhiyo maalgashiga lagu sameynayo warshadaha dawooyinka ee Afrika, isagoo xusay in wax-soo-saarka gudaha uu yareyn doono ku tiirsanaanta dawooyinka dibadda laga keeno isla markaana uu sare u qaadi doono adkeysiga nidaamyada caafimaadka.
