Muqdisho (Dawan)- Iyadoo Soomaaliya ay wajahayso saameynta sii kordheysa ee isbeddelka cimilada, oo ay ka mid yihiin abaaraha soo noqnoqda iyo fatahaadaha, ayaa magaalada Muqdisho waxaa ka furmay shirweynaha sannadlaha ah ee saddexaad ee diiradda lagu saarayo xoojinta awoodda dalka ee u-diyaargarowga iyo ka jawaabista musiibooyinka.
Shirkan oo ay si wadajir ah u qabanayaan Hay’adda Maareynta Masiibooyinka Qaranka (SoDMA) iyo Jaamacadda Muqdisho, soconayana muddo laba maalmood ah, ayaa halkudhiggiisu yahay “ka gudbida musiibooyinka soo noqnoqda ilaa adkaysi waara.”
Guddoomiyaha SoDMA, Maxamuud Macallin, ayaa sheegay in Soomaaliya ay wajahdo caqabado ka dhashay isbeddelka cimilada, gaar ahaan abaaraha iyo fatahaadaha soo noqnoqda, kuwaas oo saameeya nolosha dadka iyo hab-nololeedkooda. “ Soomaaliya waxay wajahaysaa aafooyinka ka dhasha isbeddelka cimilada, mar roobab, marna abaaro,” ayuu yiri Maxamuud Macallin.
