Addis Ababa (Dawan) – Midowga Afrika ayaa dib u eegis ku sameeyay heerka u-diyaargarowga dalalka xubnaha ka ah ee ku aaddan El Niño xooggan oo la saadaaliyay inuu dhaco dabayaaqada sanadkan, iyadoo la sheegay inay jirto 90% suurtagalnimada inuu noqdo mid ka mid ah dhacdooyinkii ugu xoogga badnaa ee qaaraddu wajahdo tan iyo sanadkii 1950.
Shirka gaarka ah ee Wasiirrada Midowga Afrika ee u qaabilsan la-tashiga u-diyaargarowga El Niño iyo jawaabta qaaradda, oo ka dhacay xarunta Midowga Afrika ee Addis Ababa, ayaa lagu falanqeeyay heerka diyaar-garowga dalalka, xoojinta iskaashiga iyo qaababka looga hortagi karo saameynta cimilada ee la filayo inay gaarto heerkii ugu sarreeyay inta u dhexeysa bilaha Noofambar 2026 iyo Febraayo 2027.
Wakiilka Midowga Afrika ee Beeraha, Horumarinta Reer Miyiga, Dhaqaalaha Buluugga ah iyo Deegaanka Waara (ARBE), Moses Vilakati, ayaa sheegay in saadaasha cilmiyeed ay muujinayso 90% suurtagalnimada inuu El Niño bilowdo dabayaaqada sanadkan, isagoo xusay in haddii saadaashu rumoowdo uu noqon karo kii ugu xoogga badnaa tan iyo 1950-kii.
Vilakati ayaa ku boorriyay dowladaha Afrika inay ka gudbaan marxaladda digniinta hore una dhaqaaqaan tallaabooyin degdeg ah oo lagu xoojinayo u-diyaargarowga, isagoo ka digay in qaybo badan oo qaaradda ah ay wajihi karaan abaaro ba'an, fatahaado, kuleyl daba dheeraada, cunno yari, cudurro faafa iyo baahiyo bani'aadamnimo oo sii kordha haddii aan la qaadin tallaabooyin ku filan.
“Waxa kala saari doona dhibaato la maareyn karo iyo masiibo bani'aadamnimo waxay ku xirnaan doontaa tallaabooyinka aan qaadno ka hor inta aysan saameyntu imaan,” ayuu yiri Vilakati.
