Muqdisho (Dawan)— Bangiga Bulsho Development Bank ayaa bilaabay adeeg cusub oo kayd dijitaal ah oo lagu magacaabo KULMIYE, kaas oo macaamiisha u oggolaanaya inay si fudud u maareeyaan lacagtooda iyo kaydkooda, sida uu bangigu sheegay Isniintaan. Bangigu wuxuu sheegay in adeegga KULMIYE lagu isticmaali karo app-ka WAAFI, iyadoo macaamiishu ay awood u yeelanayaan inay lacagaha u kala wareejiyaan akoonnada Bulsho Development Bank iyo adeegga EVC Plus.
Macaamiisha isticmaala EVC Plus ayaa lacag uga wareejin kara akoonkooda EVC Plus akoonka Bulsho Development Bank, halka dadka leh akoon bangi ay sidoo kale lacag uga diri karaan akoonkooda EVC Plus, sida lagu sheegay ogeysiiska bangiga.
Bulsho Development Bank ayaa sheegay in KULMIYE uu yahay adeeg loogu talagalay in lagu fududeeyo kaydinta, dirista iyo helista lacagaha, iyadoo macaamiisha loo oggolaanayo inay adeegyadaas ku maareeyaan si dijitaal ah.
