Jigjiga (Dawan) – Dowlad Deegaanka Soomaalida ayaa 10 guri oo cusub ku wareejisay qoysas dakhligoodu hooseeyo oo ku nool magaalada Shabeeleey, iyadoo qayb ka ah barnaamij dowladeed oo lagu horumarinayo xaaladda nololeed ee qoysaska nugul.
Munaasabadda wareejinta furayaasha guryaha, waxaa ka qayb galay Madaxweynaha Dowlad Deegaanka Soomaalida, Mustafe Maxamed Cumar, halka qoysaska ka faa'iideystay ay si rasmi ah u guddoomeen guryaha ay dhistay Wasaaradda Gaadiidka iyo Saadka ee Dowladda Federaalka Itoobiya, sida uu sheegay Xafiiska Isgaarsiinta Dowlad Deegaanka Soomaalida.
Maamulka ayaa sheegay in mashruucan uu ku kacay ku dhowaad 45 milyan oo birr (qiyaastii 330,000 oo doollar), isla markaana uu qayb ka yahay dadaallo ballaaran oo lagu ballaarinayo helitaanka guryo ay awoodi karaan qoysaska dhaqaalahoodu hooseeyo.
