Muqdisho (Dawan)- Golaha Shacabka ee Baarlamaanka Federaalka Soomaaliya ayaa akhrintii koowaad marsiiyay Hindise-Sharciga Difaaca Qaranka, kaas oo ay soo gudbisay Wasaaradda Gaashaandhigga Soomaaliya. Hindise-sharcigan ayaa diyaarintiisa iyo ka shaqayntiisa ay soo socotay tan iyo 2019-kii, waxaana hadda la horgeeyay Baarlamaanka 11-aad si loo mariyo hannaanka sharci-dejinta.
Wasiiru-dowlaha Wasaaradda Gaashaandhigga, Cumar Cali Cabdi, oo Golaha Shacabka ka hor hadlay, ayaa sheegay in ciidamada Soomaaliya ay weli ku shaqeeyaan xeerar ka soo haray xilligii dowladdii milateriga, kuwaas oo uu sheegay in loo baahan yahay in dib loo eego.
Wasiiru-dowlaha ayaa sheegay in Soomaaliya ay u baahan tahay sharci difaac oo dhammaystiran, kaas oo qeexaya qaab-dhismeedka ciidamada iyo masuuliyadaha hay’adaha kala duwan ee ku lug leh difaaca dalka.
“Sharcigan wuxuu fududeynayaa dhismaha ciidan awood u leh inuu si buuxda ula wareego mas’uuliyadda amniga dalka,” ayuu yiri Cumar Cali Cabdi.
