Jabuuti (Dawan ) – Ciidamada Amaanka Qaranka ee Jabuuti ayaa howlgal ay ka fuliyeen deegaanka Ambouli ku qabtay ku dhawaad 12 qof oo lagu tuhunsan yahay ka ganacsiga daroogada, sida lagu sheegay war kasoo baxay hay’adaha ammaanka.
Howlgalka ayaa lagu beegsaday guri ay ciidamada ammaanku sheegeen inuu noqday xarun ay ku shaqeeyaan shabakado ka ganacsada daroogada nuucyadeeda kala duwan. Intii lagu guda jiray howlgalka, ciidamada ayaa gacanta ku dhigay ku dhawaad laba kiilo oo xashiish ah iyo dhowr hub.
Booliska ayaa sidoo kale soo helay in ka badan 60 taleefan gacanta ah, kuwaas oo baaritaannada hordhaca ah lagu ogaaday in qaar badan loo adeegsaday falal baad iyo handadaad.
Mas’uuliyiinta ayaa sheegay in howlgalka uu qayb ka yahay dadaallada ay ciidamada Amaanka Qaranka ku xoojinayaan la dagaallanka ganacsiga sharci-darrada ah iyo sugidda ammaanka caasimadda Jabuuti, gaar ahaan deegaannada ay ka howlgalaan shabakadaha dembiyeed.
