Jabuuti (Dawan)- Magaalada Obock ee waqooyiga Jabuuti ayaa noqotay goobta ugu weyn ee ay soo gaaraan Yemeniyiinta ka cararaya colaadaha dib uga qarxay dalka Yemen. Sida laga soo xigtay xogta ay baahisay dowladda Jabuuti, kumannaan Yemeniyiin ah ayaa 48 saacadood gudahood soo gaaray xeebaha dalka, iyadoo tirada guud ee la sheegay ay gaareyso ku dhowaad 3,400 qof. Warbaahinta dowladda ayaa sidoo kale sheegtay in doomo kale oo ay saaran yihiin dad ka soo cararay colaadaYemen la filayo inay soo gaaraan xeebaha Jabuuti.
Dadkan ayaa isugu jira rag, haween iyo carruur, kuwaas oo safarka badda ku maray marinka Bab al-Mandab, oo isku xira Badda Cas iyo Gacanka Cadmeed.
Dowladda Jabuuti ayaa bilowday hab-raac loogu talagalay soo dhaweynta dadka cusub, iyadoo magaalada Obock laga bilaabay dadaallo lagu siinayo adeegyada aasaasiga ah.
Mid ka mid ah kooxihii ugu dambeeyay ee soo gaaray Obock ayaa yimid xilli habeen ah. Mas’uuliyiinta deegaanka ayaa qeyb ka ahaa soo dhaweynta iyo diyaarinta adeegyada loogu talagalay dadka cusub.
Ra’iisul Wasaaraha Jabuuti, Cabdulqaadir Kaamil Maxamed, ayaa gaaray magaalada Obock si uu ugu kuurgalo xaaladda dadka Yemeniyiinta ah ee dalka soo gaaraya. Sida uu sheegay telefishinka dowladda Jabuuti, Ra’iisul Wasaaruhu wuxuu hay’adaha dalka faray inay si wanaagsan u daryeelaan dadka soo gaaraya, isla markaana mudnaanta la siiyo badbaadadooda iyo amnigooda.
Culeyska ugu weyn ayaa hadda saaran maamulka deegaanka Obock, oo wajahaya baahi degdeg ah oo la xiriirta biyo, cunto, hoy iyo adeegyo nadaafadeed.
