Madaxda dalalka ciidamada AUSSOM oo ku shiraya Kampala iyadoo la wajahayo hubanti la'aan dhinaca maalgelinta ah

Kampala (Dawan ) – Madaxda dalalka ciidamadoodu ka qayb qaataan Howlgalka Midowga Afrika ee Taageerada iyo Xasillinta Soomaaliya (AUSSOM) ayaa Jimcahan ku kulmaya magaalada Kambaala si ay uga wada hadlaan mustaqbalka howlgalka, xilli walaac laga muujinayo maalgelintiisa iyo qorshaha amni ee Soomaaliya kadib 2026.

Shirkan ayaa daba socda kulammo ay toddobaadkan yeesheen taliyeyaasha ciidamada iyo wasiirrada gaashaandhigga ee dalalka ciidamada ku taageera AUSSOM, kuwaas oo soo diyaariyay talooyin la horgeynayo madaxda dowladaha.

Waxaa shirka ka qayb galaya Soomaaliya, Uganda, Jabuuti, Itoobiya, Kenya, Masar iyo Burundi, iyadoo sidoo kale ay goob joog ka yihiin Midowga Afrika, Qaramada Midoobay iyo Urur-Goboleedka IGAD.

Sida ay sheegeen masuuliyiinta qabanqaabada, ajandaha shirka waxaa ka mid ah dib-u-eegista xaaladda amniga Soomaaliya, qiimeynta howlgalka AUSSOM, baahiyaha ciidamada, maalgelinta howlgalka iyo xoojinta iskaashiga gobolka si loo taageero kala-guurka amniga Soomaaliya.

Madaxweynaha Soomaaliya Xasan Sheekh Maxamuud ayaa Khamiistii gaaray Kampala, halkaas oo uu kula kulmay Madaxweynaha Uganda Yoweri Museveni. Labada hoggaamiye ayaa ka wada hadlay iskaashiga amniga, la dagaallanka Al Shabaab iyo taageerada caalamiga ah ee AUSSOM ka hor furitaanka shir-madaxeedka.

Shirka Kampala ayaa ku soo beegmaya iyadoo AUSSOM ay wajahayo caqabado la xiriira maalgelinta howlgalka iyo qorshaha mustaqbalka. Oggolaanshaha hadda ee howlgalka AUSSOM wuxuu ku egyahay 31-ka Diseembar 2026, taas oo ka dhigan in muddo kordhin ama isbeddel weyn oo lagu sameeyo howlgalka uu u baahan doono go'aan cusub oo Golaha Ammaanka ee Qaramada Midoobay.

AUSSOM ayaa billowday 1-dii Janaayo 2025, iyadoo beddeshay Howlgalkii Ku-meel-gaarka ahaa ee Midowga Afrika ee Soomaaliya (ATMIS). Howlgalka ayaa taageera ciidamada ammaanka Soomaaliya isagoo ka qayb qaata howlgallada wadajirka ah, tababarka, xasilinta deegaannada laga saaray Al Shabaab iyo diyaarinta ciidamada Soomaaliyeed si ay si tartiib tartiib ah ula wareegaan mas'uuliyadda amniga dalka.

Diblomaasiyiin iyo falanqeeyayaal ayaa sheegaya in go'aannada ka soo baxa shirka Kampala ay door muhiim ah ka ciyaari doonaan jihada mustaqbalka AUSSOM, gaar ahaan qaabka loo maalgelinayo howlgalka iyo taageerada caalamiga ah ee loo baahan yahay si loo sii wado dadaallada lagu xasilinayo Soomaaliya.