Muqdisho (Dawan)- Kadib dood siyaasadeed ka dhalatay maqnaanshaha qaar ka mid ah ururradii ka qaybgalay doorashadii hore ee Galmudug, Guddiga Madaxa-bannaan ee Doorashooyinka Qaranka iyo Soohdimaha ayaa soo saaray war-saxaafadeed uu ku faahfaahinayo sababta ururrada qaarkood uga maqan yihiin liiska cusub ee ka qaybgalayaasha doorashada ku celiska ah.
Labada urur ee ka maqan liiska cusub ee guddigu shaaciyay ayaa kala ah Ururka Siyaasadeed ee Towfiiq iyo Ururka Dowladda Wanaaga Soomaaliyeed.
Guddigu wuxuu sheegay in muddadii loo asteeyay ururrada siyaasadeed inay ku soo gudbiyaan liisaska musharraxiintooda ay ku ekayd 12-kii Sebtembar. Intii lagu guda jiray muddadaas, waxaa liisaskooda musharraxiinta soo gudbiyay 12 urur siyaasadeed. Guddigu wuxuu sheegay in ay jiraan ururro siyaasadeed oo diiwaangashan oo aan liisaska musharraxiintooda ku soo gudbin muddadii loo cayimay.
Guddiga ayaa sidoo kale sheegay in kulan uu yeeshay 13-kii Sebtembar lagu go’aamiyay in la shaaciyo liiska ururradii soo dhammaystiray gudbinta musharraxiintooda muddadii loo qabtay.
Ururrada ku jira liiska cusub ayaa kala ah Caddaaladda iyo Midnimada, Madalsan, Muwaadiniinta Soomaaliyeed, Dimuqraadiga Soomaaliyeed, Caddaaladda iyo Wadajirka, Dadka Soomaaliyeed, Karaama, Saab, Dan Shacab, Sincad, Dhalinyarada Talo Qaran iyo Ramaas.
Guddigu wuxuu caddeeyay in go’aanka lagu diyaariyay liiska ururrada cusub uusan ku salaysnayn arrimo siyaasadeed.
