Qaahira (Dawan)- Dowladda Federaalka Soomaaliya ayaa dadaal ugu jirta inay xoojiso iskaashiga dalalka Carabta ee dhinacyada shaqo-abuurka, horumarinta xirfadaha iyo ilaalinta bulshada, xilli magaalada Qaahira uu Axaddii ka furmay fadhiga 52-aad ee Shirweynaha Shaqada Carabta.
Wafdiga Soomaaliya waxaa hoggaaminaya Wasiirka Shaqada iyo Arrimaha Bulshada, Saalim Caliyow Ibrow, waxaana munaasabadda furitaanka sidoo kale ka qaybgalay Safiirka Soomaaliya u fadhiya Dalka Masar, Cali Cabdi Awaare.
Shirweynaha waxaa isugu yimid wakiillo ka kala socday dowladaha Carabta, loo-shaqeeyayaasha iyo ururrada shaqaalaha, si ay uga wada hadlaan caqabadaha ka jira suuqyada shaqada iyo siyaasadaha lagu ballaarin karo fursadaha shaqo. Wadahadallada ayaa sidoo kale diiradda lagu saaray horumarinta xirfadaha shaqaalaha, xoojinta nidaamyada ilaalinta bulshada iyo dhowrista xuquuqda shaqaalaha.
