Muqdisho (Dawan) — Hay’adda Qatar Charity ayaa magaalada Muqdisho ku soo gabagabeysay olole caafimaad oo lagu daweynayay carruurta qaba cilladaha wadnaha ee lagu dhasho, kaddib markii 40 carruur ah loo sameeyay qalliinno kateetar wadnaha ah.
Ololaha oo socday intii u dhexeysay 3-dii iyo 8-dii Oktoobar ayaa lagu soo xiray munaasabad uu ka qaybgalay Safiirka Qatar u fadhiya Soomaaliya, Dr. Cabdullaahi bin Saalim Al-Nu’aymi. Ololaha waxaa iska kaashaday Wasaaradda Caafimaadka Soomaaliya, Isbitaalka Takhasuska leh ee Soomaaliyeed iyo Suudaaniga ah iyo Xarunta Wadnaha ee Muqdisho.
Intii uu socday ololaha, baaritaanno caafimaad ayaa lagu sameeyay 144 carruur ah si loo ogaado cilladaha wadnaha ee lagu dhasho, halka carruurta u baahnayd daryeel caafimaad loo sameeyay qalliinno kateetar ah. Daaweynta waxaa ka qaybqaatay dhakhaatiir ku takhasusay cudurrada wadnaha carruurta.
Ololahan ayaa qayb ka ahaa hindisaha “Habeenka 27-aad ee Ramadaanka”, oo hoos yimaada ololaha samafalka ee “Dafcu Balaa”.
Agaasimaha xafiiska Qatar Charity ee Soomaaliya, Cabdifitaax Aadan Macallin, ayaa sheegay in ololuhu uu dhaafay yoolkii markii hore loo qorsheeyay ee ahaa 35 qalliin, kaddib markii tiradu gaartay 40 qalliin. Wuxuu tilmaamay in natiijadani ay muujinayso dadaallada looga jawaabayo baahida caafimaad ee carruurta Soomaaliyeed. Wuxuu xusay in natiijadaas lagu gaaray muddo kooban, inkastoo ay jireen caqabado la xiriiray waqtiga iyo shuruudaha fulinta barnaamijka. Waxa uu sidoo kale shaaciyay in hay’addu ay qorsheyneyso olole kale oo qalliinno wadnaha furan loogu sameynayo carruurta u baahan daaweyn ka baxsan awoodda kateetarka, kaas oo la filayo in la qabto ka hor dhammaadka sannadkan.
