Muqdisho (Dawan) – Safiirka Boqortooyada Ingiriiska ee Soomaaliya, Charles King, ayaa ka warbixiyay nolol-maalmeedka shaqadiisa Muqdisho, isagoo ku tilmaamay mid ka mid ah goobaha ugu halista badan ee diblomaasiyadeed, sida lagu daabacay Majalladda Monocle.
King ayaa sheegay in subaxyadiisa Muqdisho mararka qaar ay ku bilowdaan dhawaaqa diyaaradaha dagaalka, taasoo ka tarjumaysa xaaladda amni ee adag ee caasimadda. Wuxuu xusay in safaaradda UK ay ku taallo inta u dhaxaysa garoonka diyaaradaha iyo xeebta Badweynta Hindiya, taasoo siinaysa muuqaal deggan balse aan meesha ka saarin khataraha jira.
Boqortooyada Ingiriiska ayaa dib u furtay safaaraddeeda Soomaaliya sanadkii 2013, iyadoo ka mid noqotay dalalkii ugu horreeyay ee reer galbeed ah ee dib ugu soo laabtay dalka. Safaaradda ayaa tan iyo markaas la shaqeyneysay dowladaha Soomaaliya iyo saaxiibada caalamiga ah si wax looga qabto khataraha kooxaha hubeysan sida Al-Shabaab iyo Daacish, burcad-badeednimada iyo xaaladaha bani’aadamnimo.
Safiirka ayaa sheegay in shaqadiisu ay ku lug leedahay la shaqeynta howlgalka Midowga Afrika iyo taageerada Qaramada Midoobay, iyadoo dhawaaqa diyaaradaha qumaatiga u kaca ee Qaramada Midoobay uu noqday mid joogto ah oo ka mid ah nolol-maalmeedka.
