Rabat (Dawan)– Xiriirka Kubadda Cagta Afrika (CAF) ayaa si adag u cambaareeyay dhaqanno ay sameeyeen qaar ka mid ah ciyaartoyda iyo mas’uuliyiinta xulka qaranka Senegal intii lagu jiray ciyaartii kama dambaysta ahayd ee Koobka Qaramada Afrika, taas oo dhex martay xulalka Morocco iyo Senegal ee ka dhacday magaalada Rabat, ciyaartaas oo ay Senegal ku guuleysatay koobka balse dhalisay muran ballaaran.
Bayaan rasmi ah oo CAF soo saartay ayay ku sheegtay in ururku si buuxda u diidan yahay fal kasta oo aan habboonayn oo ka dhaca garoomada kubadda cagta, gaar ahaan kuwa lagu beegsanayo garsoorayaasha ama qabanqaabiyeyaasha ciyaarta. CAF waxay adkaysay in ilaalinta anshaxa ciyaarta, ixtiraamka shuruucda kubadda cagta iyo badbaadada dhammaan ka qaybgalayaasha ay yihiin mudnaanta koowaad.
“CAF si adag ayay u cambaareyneysaa dhaqan kasta oo aan la aqbali karin oo ka dhaca ciyaaraha, gaar ahaan falalka lagu beegsanayo garsoorayaasha ama qabanqaabiyeyaasha ciyaarta, waxayna dib u eegis ku sameyneysaa dhammaan muuqaallada si tallaabo sharci ah looga qaado cid kasta oo lagu helo dambiga,” ayaa lagu yiri war-murtiyeedka.
Ururku wuxuu sidoo kale xaqiijiyay in dhammaan muuqaalladii laga duubay ciyaarta dib loo eegi doono, isla markaana arrinta loo gudbin doono hay’adaha ku shaqada leh, si tallaabooyin ku habboon looga qaado cid kasta oo lagu helo ku xadgudub anshaxeed ama mid sharci.
Dhanka kale, Xiriirka Kubadda Cagta Morocco (FRMF) ayaa ku dhawaaqay in uu si rasmi ah dacwad ugu gudbiyay CAF iyo Xiriirka Caalamiga ah ee Kubadda Cagta (FIFA), isagoo raacaya dhammaan habraacyada iyo shuruucda caalamiga ah ee quseeya ciyaarta.
