Muqdisho (Dawan)- Tan iyo yaraantiisii, Xasan Anwar Maxamed wuxuu xiise gaar ah u qabay ciyaarta feerka. Sannado tababar, dadaal iyo diyaar-garow ah kaddib, wuxuu fursad u heli doonaa inuu riyadiisii u beddelo xaqiiqo, isaga oo Soomaaliya ku matalaya tartanka feerka ee Ciyaaraha Olombikada Dhallinyarada, kaas oo ka dhacaya magaalada Dakar ee dalka Senegal.
Xasan oo 17 jir ah ayaa ka mid ah ciyaartoyda ay Soomaaliya rajada weyn ka qabto tartankan, kaas oo bilaabanaya 31-ka Oktoobar 2026.
Xasan, oo ku tartamaya qaybta miisaanka 50-ka kiilo, ayaa sheegay inuu ku faraxsan yahay fursadda uu dalkiisa ugu matalayo fagaaraha caalamiga ah, isaga oo aan guusha oo keliya ka dhigin waxa uu ka filayo tartanka.
“Berri ayaan baxayaa, ciyaaraha ayaan ka qaybgalayaa. Marka aan tartanka galo, guul iyo guuldarraba waan ku qanacsanahay,” ayuu yiri Xasan.
Isaga oo la hadlayay Dawan, Xasan wuxuu sheegay in ka qaybgalka tartan heerkan ah uu ahaa riyo uu muddo dheer ku taamayay, isla markaana uu mar walba doonayay inuu Soomaaliya ku matalo tartamada caalamiga ah.
Tababaraha Xasan, Maxamed Axmed Cabdullaahi, ayaa sheegay in feeryahankiisu diyaar u yahay tartanka, kaddib tababar iyo diyaar-garow muddo socday.
“Waxaan dadka tusaynaa cidda aan nahay,” ayuu yiri tababaraha, oo Xasan kula tababaranayay xarunta Mecca Gym ee ku taalla waddada 4-aad, xaafadda Eastleigh ee magaalada Nairobi.
Markii la weydiiyay inay jiraan dalal ama feeryahanno gaar ah oo ay jeclaan lahaayeen in Xasan uusan wajihin wareegyada hore ee tartanka, tababaruhu wuxuu sheegay in feeryahan dhab ahi uusan cid gaar ah ka cabsanayn.