Waajid (Dawan) — Hay’adda Maareynta Musiibooyinka Qaranka ee SODMA ayaa gargaar raashin ah gaarsiisay 4,000 oo qoys oo danyar ah oo ku nool degmada Waajid ee gobolka Bakool, oo ka tirsan Dowlad-goboleedka Koonfur Galbeed. SODMA ayaa sheegtay in gargaarka mudnaan gaar ah lagu siiyay qoysaska aadka u nugul ee ay saameeyeen abaarta iyo xaaladaha nololeed ee sii adkaanaya.
Muuqaal ay hay’addu Axaddii ku baahisay boggeeda Facebook ayaa muujiyay qoysaska oo la guddoonsiinayo raashin ay ka mid yihiin bur, bariis, sonkor iyo saliid. Gargaarkan ayaa qayb ka ah barnaamijka gurmadka abaaraha, kaas oo lagu taageerayo qoysaska ay saameeyeen roob-yaraanta iyo cunto-la’aanta ka jirta qaybo ka mid ah dalka.
Qaar ka mid ah qoysaska ka faa’iideystay ayaa SODMA uga mahadceliyay gargaarka, iyagoo sheegay inuu wax ka tari doono baahiyaha nololeed ee haysta.
