Soomaaliya (Dawan)- Afar qof ayaa ku dhimatay, lix kalena waa ay ku dhaawacmeen shil ka dhashay isku dhaca dhowr baabuur oo ka dhacay Gabiley, Somaliland, xalay oo Jimco ahayd, sida ay sheegeen mas’uuliyiinta gobolka maanta oo Sabti ah.
Shilkan waxaa ku lug ku lahaa afar baabuur, oo uu ku jiro baabuur ay saarnaayen dadweyne, sida ay sheegeen Guddoomiyaha Gabiley Maxamuud Xasan Sacad iyo Taliyaha Ciidanka Wadooyinka Somaliland Maxamed Cige.
Labada mas’uul ayaa sheegay in shilku ka dhacay waddo toosan oo xaaladdeedu wanaagsan tahay.
Taliyaha Ciidanka Wadooyinka, Maxamed Cige, ayaa sheegay in shilka uu ka dhashay wadista taxadar la’aanta ah iyo xawaare aad u sarreeya, isagoo uga digay darawallada inay muujiyaan feejignaan dheeraad ah.
