Xasan Sheekh oo diiday in arrimaha siyaasadda gudaha lagu daro warmurtiyeedka Shirka AUSSOM

Kampala (Dawan) – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa ka horyimid in arrimaha siyaasadda gudaha Soomaaliya lagu daro qabyo-qoraalka warmurtiyeedka Shir-madaxeedka Gaarka ah ee Madaxda Dowladaha Ciidamada ku Taageera Hawlgalka Midowga Afrika ee Soomaaliya (AUSSOM), isagoo sheegay in ujeeddada shirku tahay ka doodista amniga iyo xal u helidda caqabadaha dhaqaale ee horyaalla hawlgalka.

Isagoo khudbad ka jeediyay fadhiga guud ee shir-madaxeedka, Madaxweyne Xasan Sheekh ayaa uga mahadceliyay masuuliyiinta diyaariyay qabyo-qoraalka warmurtiyeedka, hase yeeshee wuxuu codsaday in laga saaro qodobbada ka hadlaya geeddi-socodka siyaasadeed ee gudaha Soomaaliya.

Qabyo-qoraalka warmurtiyeedka, waxaa ku jiray qodobbo lagu adkeynayay midnimada Soomaaliya, xoojinta dimuqraadiyadda iyo hay'adaha dowladeed, iyadoo sidoo kale Madaxweynaha Soomaaliya laga codsaday inuu qabto shir ay isugu yimaadaan hoggaamiyeyaasha siyaasadda Soomaaliya iyo madaxda dowlad-goboleedyada, halka madaxda dalalka ciidamada AUSSOM ay uga qayb geli lahaayeen kormeerayaal ahaan.

Madaxweyne Xasan Sheekh ayaa sheegay in arrimaha siyaasadda Soomaaliya ay yihiin kuwo gudaha u gaar ah, isla markaana aan loo baahnayn in lagu daro warmurtiyeedka shirkan.

"Waa arrimo gudaha oo Soomaaliya u gaar ah, Soomaaliya-na ma doonayso in lagu daro warmurtiyeedkan," ayuu yiri Madaxweynuhu.

Wuxuu xusay in shirkan loo qabtay sidii looga arrinsan lahaa caqabadaha amniga, dagaalka lagula jiro Al-Shabaab iyo sidii xal loogu heli lahaa maalgelinta Hawlgalka AUSSOM, isagoo tilmaamay in qodobadaasi si ku filan ugu jiraan qabyo-qoraalka.

Madaxweynuhu wuxuu sidoo kale carrabka ku adkeeyay in siyaasadda gudaha Soomaaliya aan laga dhigin arrin heer gobol ama heer caalami laga maamulo, isagoo sheegay in dowladda Soomaaliya ay arrimaha siyaasadeed ku xallin doonto hannaan gudaha ah, iyadoo ka faa'iidaysanaysa talada iyo taageerada saaxiibbada gobolka, balse aan lagu maareyn doonin warmurtiyeed caalami ah.

Guddoomiyaha shirka ahna Madaxweynaha Uganda, Yoweri Museveni, ayaa weydiiyay Madaxweynaha Soomaaliya haddii uu doonayo in gebi ahaanba laga saaro warmurtiyeedka qaybta la xiriirta horumarka siyaasadeed ee dalka.

Madaxweyne Xasan Sheekh ayaa ku jawaabay in wafdigiisa uu la shaqeyn doono kooxda farsamada ee diyaarisay qoraalka si wax looga beddelo qaybtaas, taas oo keentay in Madaxweyne Museveni uu faro masuuliyiinta shirka inay dib u eegis ku sameeyaan qabyo-qoraalka.

Shir-madaxeedka waxaa isugu yimid madaxda dowladaha ciidamada ku taageera Hawlgalka Midowga Afrika ee Soomaaliya (AUSSOM), waxaana diiradda lagu saaray mustaqbalka hawlgalka, dardargelinta dagaalka lagula jiro kooxda Al-Shabaab iyo sidii xal waara loogu heli lahaa caqabadaha dhinaca maalgelinta ee horyaalla hawlgalka.

Xasan Sheekh oo diiday in arrimaha siyaasadda gudaha lagu daro warmurtiyeedka Shirka AUSSOM

Maxay ku xiran tahay sii socoshada taageerada milatari ee uu Mareykanka siiyo Soomaaliya?

Taliyaha AFRICOM: Dhismaha Ciidamada Danab waa la dhammaystiray, mas’uuliyadda horumarintoodana waxay saaran tahay Soomaaliya

AFRICOM oo beenisay inuu jiro qorshe Mareykan uu saldhig ciidan uga dhisayo Somaliland

Imisa ayaa la qorsheeyay in AUSSOM ku wareejiso mas’uuliyadda amniga Soomaaliya?

Maqaallo La Xidhiidha

Taliyaha AFRICOM: Ciidamada Soomaaliya waxay dib ula wareegayaan deegaanno horay looga xoreeyay Al-Shabaab

Taliyaha AFRICOM: Khilaafaadka siyaasadeed wuxuu wiiqi karaa sii socoshada taageerada Mareykanka ee Soomaaliya

U gaar ah Dawan Media: Madaxweynaha Soomaaliya oo ku hanjabay inuu xilka ka qaadi doono wasiirrada ku safra baasaboorrada ajnabiga ah

Qoraallo Cusub

Maxay ku xiran tahay sii socoshada taageerada milatari ee uu Mareykanka siiyo Soomaaliya?

Taliyaha AFRICOM: Dhismaha Ciidamada Danab waa la dhammaystiray, mas’uuliyadda horumarintoodana waxay saaran tahay Soomaaliya

AFRICOM oo beenisay inuu jiro qorshe Mareykan uu saldhig ciidan uga dhisayo Somaliland

Qaybaha