Xasan Sheekh oo markale wadahadal ugu baaqay Mucaaradka

Muqdisho (Dawan ) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si rasmi ah ugu casuumay Golaha Mustaqbalka ka qeybgalka kulan siyaasadeed oo lagu wado inuu ka dhaco Muqdisho 10-ka May 2026, sida lagu sheegay warsaxaafadeed ka soo baxay Villa Somalia.

Warsaxaafadeedka ayaa lagu sheegay in kulankan uu ka dhashay wadatashiyo uu madaxweynuhu la yeeshay siyaasiyiin, madax hore, odayaasha dhaqanka iyo qeybaha kala duwan ee bulshada Soomaaliyeed muddooyinkii u dambeeyay.

Kulanka ayaa diiradda lagu saari doonaa arrimo muhiim ah oo quseeya mustaqbalka dalka, oo ay ugu horreeyaan geeddi-socodka dowlad-dhiska, doorashooyinka, xoojinta midnimada qaranka iyo jihada siyaasadeed ee Soomaaliya.

Villa Somalia ayaa sheegtay in kulanka lagu qabanayo jawi ku dhisan daahfurnaan, mas’uuliyad iyo niyad wanaag, si loo helo natiijooyin wax ku ool ah oo ka soo baxa wadahadallada.

Madaxweynaha ayaa sidoo kale xusay in xilligan ay lagama maarmaan tahay in dhinacyadu muujiyaan isu-tanaasul iyo is-qancin si loo gaaro is-afgarad siyaasadeed oo waara.

Warsaxaafadeedka ayaa intaas ku daray in Dowladda Federaalka Soomaaliya ay ka go’an tahay xoojinta hannaan siyaasadeed oo ku dhisan wadajir iyo is-afgarad, iyadoo la ilaalinayo midnimada, madaxbannaanida iyo dowladnimada dalka.