Bakool (Dawan) — Shacabka deegaanka Aato ee gobolka Bakool ayaa mashruuc ay si wadajir ah u maalgeliyeen ku hirgeliyay nalalka waddooyinka ee ku shaqeeya tamarta cadceedda, kuwaas oo si rasmi ah loo shiday fiidkii, iyaga oo iftiimiyay waddooyinka deegaanka.
Sida uu shaaciyay Telefishinka Koonfurgalbeed, mashruucan waxaa lagu fuliyay dhaqaale ay bulshada iyo dhallinyarada deegaanka si iskood ah u ururiyeen. Sida lagu sheegay xogta laga helay deegaanka, dowladda iyo hay’adaha caalamiga ahi kama qayb qaadan hirgelinta mashruuca.
Nalalkan ayaa isbeddel muuqda ku sameeyay muuqaalka waddooyinka Aato, kuwaas oo markii hore mugdi ahaan jiray marka ay qorraxdu dhacdo. Iftiinka cusub ayaa muujinaya dadaalka ay bulshada deegaanku ku bixisay hagaajinta kaabayaasha aasaasiga ah.
Carab Cabdi Xasan, oo ka mid ah dadka deegaanka, ayaa muujiyay farxadda ay bulshadu ka qabto hirgelinta mashruuca, isaga oo xusay doorka dhallinyarada iyo shacabka ee suurageliyay in nalalka la shido.
