Muqdisho (Dawan) — Madaxweynaha Puntland Siciid Cabdullaahi Deni ayaa Talaadadii booqday deegaanka Dhinawda ee gobolka Mudug, halkaas oo uu sheegay in puntland ay wax ka qaban doonto xaaladda deegaanka oo ay saameeyeen abaar, xaalado adag iyo bacaad guurguura.
Deni ayaa sheegay in mudnaanta koowaad ay tahay in laga shaqeeyo nabadda, isagoo xusay in colaadaha ay sii xumeeyeen xaaladda dadka deegaanka iyo awoodda bulshada ay ugu adkaysan karto duruufaha jira.
“Waxaa ugu horreeya inaan kow ka shaqeyno nabadda,” ayuu Deni yiri.
Wuxuu sheegay in tallaabada xigta ay noqon doonto wax ka qabashada xaaladda deegaanka iyo arrimaha kale ee saameeyay dadka, isagoo xusay caafimaadka, waxbarashada iyo horumarinta adeegyada bulshada.
Deni ayaa sidoo kale sheegay in Puntland ay awooddeeda ku aaddan wax ka qabashada xaaladda dadka deegaanka u adeegsan doonto, isagoo ballanqaaday in dowladda ay la qaybsan doonto bulshada duruufaha ay wajahayaan.
Dhinawda ayaa muddooyinkii dambe wajahaysay Bacaad guurguura iyo abaar, kuwaas oo saameeyay nolol-maalmeedka dadka iyo xoolaha. Warbixin hore oo Radio Ergo ah ayaa sheegtay in ciiddu ay aastay guryo ayna xireen waddooyin muhiim u ahaa gaarsiinta raashinka, iyadoo qiyaastii 1,300 qoys ay xilligaas wajahaysay cunto yari.
