Muqdisho (Dawan)– Hay’adda Horn of Africa Marine Environment & Blue Economy (HOMEBE) ayaa ka digtay in wasakhowga sii kordhaya ee wabiyada Soomaaliya uu khatar weyn ku yahay caafimaadka dadka, nolosha xoolaha iyo deegaanka badda.
Digniintan ayaa lagu soo bandhigay munaasabad lagu xusayay Maalinta Caalamiga ah ee Wabiyada Adduunka, taas oo hay’addu shalay oo Axad ahayd ku qabatay magaalada Muqdisho.
Guddoomiyaha HOMEBE, Cabdisalaan Maxamed Xaaji, ayaa sheegay in wax kasta oo wabiyada lagu shubo ay leeyihiin saddex waji oo waxyeello ah.
“Marka koowaad, wabiga laftiisa ayay waxyeelayaan; marka labaad, dadweynaha iyo duunyada deegaannada ku xeeran ayay waxyeelayaan; marka saddexaadna, badda ayay ku shubmayaan,” ayuu yiri.
Wuxuu xusay in qashinka iyo wasakhda uu wabigu qaado ay ugu dambayn gaaraan badda, halkaas oo ay khatar ku noqdaan noolaha ku jira. Guddoomiyuhu wuxuu sheegay in HOMEBE ay samaysay qiimeyn ku saabsan xaaladda wabiyada Soomaaliya, taas oo muujisay in wabiyadu ay aad u dhibaataysan yihiin. Qiimeyntaas ayaa lagu ogaaday in magaalo kasta oo wabigu maro uu isu beddelay goob qashin lagu shubo.
“Waxaa noo muuqata in khatar aad u weyn ay meesha ka soo socoto, khatartaasna cid iska xil-saartay ma jirto,” ayuu yiri Guddoomiyuhu, isagoo tilmaamay in aan la hayn qaab loo daryeelo wabiyada.
Munaasabadda waxaa ka qayb galay khubaro ku takhasustay arrimaha deegaanka iyo bulsho u badan beeraley, kuwaas oo ah dadka ugu badan ee ku tiirsan wabiga, kuna nool deegaannada uu saameeyo wasakhowgu.
Dhanka kale, Maamulaha Guud ee Mashar Consulting, Maxamed Cumar, ayaa ka hadlay dhibaatooyinka kale ee haysta wabiga, isagoo sheegay in wabiga oo aan la qodin muddo sanado ah uu cabbirkiisu yaraaday.
