Ankara (Dawan) – Dowladda Turkiga ayaa maanta oo Khamiis ah beenisay warar sheegayay inay qorshaynayso in Soomaaliya ay u dirto 15,000 oo askari, iyadoo caddeysay in doorkeeda milatari ee dalka uu weli ku kooban yahay tababar, talobixin iyo gargaar milatari.
“Sheegashooyinka ah in Turkigu 15,000 oo askari u diri doono Soomaaliya, kaddib codsi uga yimid Dowladda Soomaaliya, ma aha kuwo run ah,” ayuu yiri afhayeenka Wasaaradda Difaaca Turkiga, Admiral Zeki Aktürk.
Aktürk ayaa hadalkan ka sheegay shir jaraa'id oo toddobaadle ah oo ay Wasaaradda Difaaca Turkigu ku qabatay magaalada Istanbul, isaga oo ka jawaabayay su’aalo ay weriyeyaashu ka weydiiyeen wararka la xiriira qorshaha la sheegay. Afhayeenku wuxuu sheegay in Taliska Hawlgalka Soomaaliya iyo Turkiga iyo Taliska Ciidanka Cirka ee Turkiga, oo labaduba saldhig ku leh Soomaaliya, ay sii wadaan dadaallada lagu xoojinayo awoodda Soomaaliya ee la dagaallanka argagixisada, iyagoo adeegsanaya taageero milatari, tababar iyo talobixin.
Beeninta Turkiga ayaa timid kaddib markii toddobaadkii hore baraha bulshada iyo qaar ka mid ah warbaahinta Soomaaliyeed lagu baahiyay warar aan lagu xigan ilo xogtooda la xaqiijiyay. Wararkaas ayaa sheegayay in Soomaaliya ay saaxiibbadeeda ka codsatay inay dalka u soo diraan 20,000 oo askari, kaddib markii Uganda ay ciidamadeeda kala baxday Soomaaliya.