Gobolka Carta oo helay agab caafimaad oo daboolaya baahida bulshada

Jabuuti (Dawan)– Wasiirka Caafimaadka Jabuuti, Axmed Roble, ayaa Arbacadii booqasho hawleed ku tagay magaalada Carta, isaga oo hoggaaminayay wafdi ka socday Wasaaradda Caafimaadka, halkaas oo uu agab caafimaad ku wareejiyay isbitaallada iyo xarumaha caafimaadka ee gobolka.

Booqashadan ayaa qeyb ka ah dadaallada dowladda ee lagu xoojinayo adeegyada caafimaadka dalka, si muwaadiniintu u helaan adeegyo tayo leh oo joogto ah.

Agabka la qaybiyay waxaa ka mid ahaa dawooyin, qalab caafimaad, iyo sahay kale oo muhiim u ah hawlaha caafimaadka, kuwaas oo sidoo kale la gaarsiiyay degmada Leyta ee Gobolka Carta.

Wasiirka ayaa kulan xog wareysi ah la yeeshay howlwadeenada caafimaadka, isagoo ku boorriyay in si hufan oo xilkasnimo leh loo maareeyo sahayda la keenay si ay uga faa’iideystaan dadka ugu baahida badan.

Dadka deegaanka ayaa si diirran u soo dhoweeyay wafdiga, iyagoo uga mahadceliyay dowladda iyo dhammaan cidda ka qeyb qaadatay hirgelinta barnaamijkan.

Barnaamijkan ayaa ah mid si joogto ah, saddexdii biloodba mar, loogu gaarsiinayo gobollada dalka, waxaana horey adeegyo la mid ah loogu wareejiyay Gobolka Tajourah, taasoo muujineysa dadaalka lagu xaqiijinayo sinaanta iyo joogtaynta adeegyada caafimaadka guud ahaan dalka.