Addis Ababa (Dawan)— Wasiirka Shaqada Jabuuti, Yoonis Cali Geedi, iyo safiirka Canada ee Itoobiya, Nicolas Simard, ayaa Shalay Addis Ababa ku yeeshay kulan looga hadlay iskaashiga labada dal ee isu-socodka shaqaalaha, horumarinta xirfadaha iyo helitaanka fursadaha shaqo ee caalamiga ah, sida ay sheegtay Wakaaladda Wararka Jabuuti.
Kulanka waxaa wasiirka ku weheliyay safiirka Jabuuti ee Itoobiya, Abdi Mahamoud Haybe. Wadahadallada ayaa diiradda lagu saaray sidii loo horumarin lahaa isu-socod shaqaale oo nidaamsan oo ammaan ah, iyadoo la tixgelinayo xirfadaha shaqaalaha iyo baahiyaha suuqa shaqada ee waddamada loo dirayo.
Labada dhinac ayaa sidoo kale ka hadlay waayo-aragnimada barnaamijka shaqo-u-helidda darawallada gaadiidka xamuulka culus ee Jabuuti ee Canada. Sida ay sheegtay ADI, waayo-aragnimadaas ayaa loo arkaa tallaabo bilow ah oo laga faa’iidaysan karo si loo diyaariyo kooxaha shaqaalaha ee mustaqbalka, loona xoojiyo tababarka luqadda iyo xirfadaha shaqo.
