Jabuuti (Dawan) — Dowladda Jabuuti ayaa ka digtay isku day kasta oo hal dhinac ah oo lagu soo rogi karo canshuur ama lacag marin maraakiibta marta marin-biyoodka Baabul-Mandab, iyadoo sheegtay in tallaabadaasi ay jebinayso sharciga caalamiga ah isla markaana ay khatar ku tahay ammaanka mid ka mid ah marinnada badeed ee ugu muhiimsan dunida.
Bayaan ay dowladda soo saartay oo ay Arbacadii daabacday Wakaaladda Wararka Jabuuti (ADI) ayaa lagu sheegay in Jabuuti ay ka go’an tahay ilaalinta xorriyadda isu socodka maraakiibta iyo ku dhaqanka nidaamka sharciyeed ee caalamiga ah ee maamula marin-biyoodka loo adeegsado isu socodka badda ee caalamiga ah.
Dowladda Jabuuti ayaa tilmaantay in Baabul-Mandab, oo u dhxeeya qaaradaha Afrika iyo Aasiya, isla markaana isku xira Gacanka Cadmeed iyo Badda Cas, uu yahay marin-biyood caalami ah oo muhiim u ah ganacsiga dunida, loona baahan yahay inuu ahaado mid u furan maraakiibta caalamiga ah.
Marin-biyoodkan ayaa sidoo kale muhiim u ah isu socodka tamarta caalamka. Sida ay sheegtay Hay’adda Macluumaadka Tamarta ee Mareykanka (EIA), qiyaastii 4.2 milyan oo foosto maalintii oo shidaal cayriin ah iyo badeecooyin shidaal ah ayaa maray Baabul-Mandab lixdii bilood ee ugu horreysay sannadka 2025, marka loo eego 9.3 milyan oo foosto maalintii sannadka 2023.
Sidoo kale, maraakiibta sida gaaska dabiiciga ah ee dareeraha ah (LNG) ayaa ku dhowaad gebi ahaanba joojiyay adeegsiga marin-biyoodkan intii lagu jiray sannadka 2024 iyo qeybtii hore ee 2025, sababo la xiriira khataraha amni iyo kororka kharashaadka caymiska.
