Jabuuti (Dawan)— Iyadoo la filayo in saameynta cimilada ee El Niño ay gobolka ka dhaliso roobab xooggan, dowladda Jabuuti ayaa magaalada caasimadda ah ka billowday howlgallo ballaaran oo looga hortagayo khatarta fatahaadaha. Hay’adaha dowladda ayaa bilaabay nadiifinta iyo dayactirka goobaha biyo-mareennada iyo meelaha loogu talagalay in biyaha roobka looga saaro magaalada.
Hay’adda Biyaha iyo Fayadhowrka Jabuuti (ONEAD) ayaa howlgalka ku bixisay shaqaale iyo qalab badan, iyadoo dayactir ku sameyneysa kanaallada iyo godadka biyaha, sidoo kalena nadiifineysa biyo-mareennada ay xireen dhir iyo qashin, gaar ahaan geedka Prosopis ee Soomaalidu u taqaano Geed Yahuud.
Dhanka kale, Hay’adda Horumarinta Reer Miyiga ee Jabuuti (ADR) ayaa ka shaqeyneysa in la qaado burburka, dhagxaanta iyo qashinka ku ururay qaar ka mid ah goobaha biyaha looga saaro magaalada, gaar ahaan agagaarka Isbitaalka Militariga ee Jabuuti
Xafiiska Waddooyinka Jabuuti (OVD) ayaa isna wada nadiifinta meelaha loo aqoonsaday inay yihiin meelaha ugu nugul fatahaadaha, halkaas oo ay si joogto ah ugu ururaan qashinka guryaha iyo kan adag.
