Madaxweynaha Soomaaliya oo sheegay in muddada Dowladda ay tahay shan sano

Muqdisho (Dawan ) – Madaxweynaha Soomaaliya Xasan Sheekh Maxamuud ayaa sheegay in muddada dowladda federaalka Soomaaliya ay tahay shan sano, isagoo sheegay in arrintaasi ay ku cadahay dastuurka la dhaqan-geliyay.

Madaxweynaha ayaa hadalkaasi ka sheegay munaasabadda 83-guurada 15-ka May ee maalinta dhallinyarada Soomaaliyeed Khamiistii, isagoo difaacay isbeddellada dastuuriga ah iyo geeddi-socodka Doorashooyinka qof iyo codka ah ee dowladda ay waddo.

“Dastuurka dhaqan galay ayay ku qoran tahay term-ka dowladda in uu yahay shan sano, ,” ayuu yiri Xasan Sheekh.

Wuxuu sidoo kale sheegay in muddada xilheynta dowladda federaalka iyo baarlamaanka ay ku egyahay sanadka 2027.

“Teeramka Baarlamaanka Federaalka Soomaaliya iyo Dowladda Federaalka Soomaaliya oo madaxweynuhu ugu horreeyo wuxuu dhacayaa 15-ka May 2027,” ayuu yiri.

Madaxweynaha ayaa carrabka ku adkeeyay in dhaqangelinta dastuurka cusub ay billowday, isagoo xusay in isbeddellada lagu sameynayo qaab-dhismeedka dowladda ay qeyb ka yihiin nidaamka cusub ee dastuuriga ah.

“Dhaqan-galkiisu waa billowday. Mar dhow, ‘xukuumadda iyo baarlamaanka hala kala saaro, ayaa ayuu dhahayey waana la kala saarayaa,” ayuu yiri.

Hadallada Madaxweynaha ayaa imanaya xilli ay weli uu taagan yahay khilaafka siyaasadeed ee la xiriira dastuurka, doorashooyinka iyo hannaanka kala-guurka siyaasadeed ee Soomaaliya.

Qaar ka mid ah mucaaradka ayaa hore u muujiyay walaac ku saabsan isbeddellada dastuurka iyo qaabka loo wajahayo doorashooyinka. Shalay, sida ay sheegeen mucaaradku, waxaa fashilmay wada-hadallo arrimahaas ku saabsanaa oo labadii maalmood ee lasoo dhaafay u dambeeyay ka socday Muqdisho, kuwaas oo u dhexeeyay Dowladda Federaalka Soomaaliya iyo Golaha Mustaqbalka Soomaaliyeed ee mucaaradka ah, isla markaana ay dhexdhexaadinayeen xubno ka tirsan beesha caalamka.

Soomaaliya ayaa muddo dheer ku jirtay hannaan siyaasadeed oo ku dhisan heshiisyo siyaasadeed iyo nidaam doorasho dadban, iyadoo dowladda hadda jirta ay sheegtay inay doonayso in dalka loo gudbiyo nidaam doorasho oo toos ah.