Laascaanood (Dawan) — Madaxweynaha Dowlad Goboleedka Waqooyi Bari Soomaaliya, Cabdiqaadir Axmed Aw-Cali ayaa sheegay in maamulkiisu uu sii jiri doono, isagoo sheegay in jiritaanka maamulka uusan ku xirneyn helitaanka ama dib-u-dhaca mashaariicda horumarineed, balse uu ku saleysan yahay rabitaanka shacabka iyo midnimada Soomaaliyeed.
Madaxweynaha ayaa hadalkan ka sheegay munaasabad lagu daahfurayay mashruuc koronto lagu gaarsiinayo xarumaha caafimaadka iyo waxbarashada ee deegaannada Waqooyi Bari Soomaaliya.
Waxa uu sheegay in dib-u-dhac ku yimaada mashaariic ama adeegyo horumarineed aan loo fasiran karin in maamulka uu wajahayo burbur ama caqabad ku saabsan jiritaankiisa.
“Haddii mashaariicdu yimaadaan maamulkeennu waa jirayaa, haddii ay dib u dhacaan-na waa jirayaa,” ayuu yiri Madaxweyne Cabdiqaadir Axmed Aw-Cali.
Madaxweynaha ayaa xusay in maamulka Waqooyi Bari uu ku dhisan yahay rabitaanka shacabka iyo dadaallo siyaasadeed oo muddo socday, sidaas darteedna aan jiritaankiisa lagu xiri karin mashruuc gaar ah, xarun la dhisayo ama adeeg horumarineed.
