Maxaa laga bartay Damal Caafimaad, maxaase laga filayaa wejiga cusub?

Wasiiru-dowlaha Wasaaradda Caafimaadka, Dr. Maryan Maxamed Xuseen, ayaa iyaduna ka qaybgalayaasha ka dalbatay inay si gaar ah u tilmaamaan baahiyihii aan mashruucu daboolin muddadii uu socday. Waxay sheegtay in casharrada laga bartay mashruuca ay muhiim u yihiin qorsheynta adeegyo caafimaad oo sii socda, gaar ahaan adeegyada ay u baahan yihiin hooyada iyo dhallaanka.

“Waxa loo shaqeynayo waa hooyo iyo dhallaan,” ayay tiri Dr. Maryan, iyadoo xustay adeegyada nafaqada, tallaalka iyo kala-dheereynta dhalmada ee laga helo xarumaha caafimaadka hooyada iyo dhallaanka.

Damal Caafimaad waa mashruuc ay dowladda Soomaaliya fuliso, waxaana maalgeliya Bangiga Adduunka. Mashruuca ayaa loogu talagalay ballaarinta adeegyada aasaasiga ah ee caafimaadka iyo nafaqada ee deegaannada uu ka shaqeeyo, iyo xoojinta awoodda wasaaradaha caafimaadka ee maamulka adeegyada.

Mashruuca ayaa la ansixiyay sannadkii 2021, waxaana Bangiga Adduunku sheegay in loo qoondeeyay deeqo dhan $100 milyan. Shirka Muqdisho, waxaa ka qaybgalay masuuliyiin ka socday dowladda federaalka, dowlad-goboleedyada, maamulka gobolka Banaadir, ururrada bulshada rayidka ah iyo hay’adaha taageera caafimaadka.