Muqdisho (Dawan) – Midowga Yurub ayaa sheegay in iskaashiga amniga ee Soomaaliya ay la socdaan tallaabooyin kormeer ah oo looga golleeyahay in ciidamada ay qalabka ku taageerto Yurub aan si xad-gudub ah loo adeegsan.
Safiirka Midowga Yurub ee Soomaaliya, Francesca Di Mauro, ayaa Dawan u sheegtay in Brussels ay adeegsato habraacyo kormeer ah marka ay la shaqeynayso hay’adaha amniga ee Soomaaliya. Tallaabooyinkan waxaa ka mid ah heshiisyo la saxiixay, tababaro la xiriira xuquuqul insaanka iyo sharciga bani’aadamnimo ee caalamiga ah, kormeer joogto ah oo lagu sameeyo goobaha ay taageeradu gaarto, iyo wada-xaajood toos ah oo lala yeesho saraakiisha difaaca iyo booliska Soomaaliya.
“Marka aan sameyno iskaashi amni, waxaa la socda tallaabooyin ilaalin ah oo cad,” ayay tiri safiir Francesca
Di Mauro ayaa tilmaantay in hay’adaha Soomaaliya ay saxiixaan heshiisyo ku waajibinaya ciidamada la taageerayo inay maraan tababaro ku saabsan xuquuqul insaanka iyo sharciga bani’aadamnimo. Waxay sidoo kale sheegtay in mas’uuliyiinta laga filayo inay tallaabo qaadaan haddii lagu ogaado xad-gudubyo.
