Remis (Dawan) – Midowga Afrika ayaa ku baaqay in meesha laga saaro caqabadaha hortaagan isu-socodka ardayda iyo cilmi-baarayaasha Afrikaanka ah ee wax ku barta Faransiiska, wuxuuna ku boorriyay in la xoojiyo iskaashiga tacliinta sare iyo hirgelinta heshiisyada waxbarasho ee ay Afrika iyo Yurub hore ugu heshiiyeen.
Baaqan ayaa laga jeediyay shirkii xagaaga ee Campus France, oo ka qabsoomay magaalada Reims 7-dii iyo 8-dii Luulyo, kaas oo diiradda lagu saaray iskaashiga tacliinta sare ee u dhexeeya Afrika iyo Faransiiska.
Shirka waxaa ka qeyb galay Wakiilka Joogtada ah ee Midowga Afrika u fadhiya Midowga Yurub, Danjire Cali Yacquub Maxamuud, oo ka qeyb qaatay dood ku saabsan xoojinta iskaashiga jaamacadaha iyo hay'adaha tacliinta sare ee labada dhinac.
Sida uu sheegay Midowga Afrika, Danjire Cali Yacquub Maxamuud ayaa ku boorriyay dhammaan dhinacyada inay u beddelaan ballanqaadyadii siyaasadeed ee lagu gaaray iskaashiga Midowga Afrika iyo Midowga Yurub, oo ay ka mid yihiin Aragtida Wadajirka ah ee 2030 iyo Bayaanka Luanda, barnaamijyo waxbarasho oo si dhab ah loo hirgeliyo.
