London (Dawan) — Sagal Cabdi-Wali, oo ah musharrax ka tirsan Xisbiga Labour-ka kuna dhalatay Soomaaliya, ayaa ku guuleysatay doorashadii kursiga baarlamaanka ee Holborn and St Pancras ee magaalada London, iyadoo heshay 12,292 cod. Waxay kursiga kala wareegtay Ra’iisul Wasaarihii hore ee Britain, Keir Starmer, oo xilkaas ka degay bishii Sebtembar.
Sagal ayaa ka guuleysatay musharraxa Xisbiga Green Party, Zack Polanski, oo helay 8,928 cod. Heerka ka-qaybgalka doorashada ayaa ahaa 38.76%, sida uu sheegay Golaha Deegaanka Camden. Sagal waxay heshay 45% codadka, halka Polanski uu helay 33%.
Khudbaddii ay jeedisay kaddib guusheeda, Sagal waxay ka hadashay safarkeedii nololeed, laga soo bilaabo markii ay carruurnimadeeda timid Britain ilaa ay ka noqotay xildhibaanka cusub ee deegaanka. Waxay sheegtay in bulshada Camden ay qoyskeeda siisay hoy, waxbarasho, fursado iyo bulsho ay ka mid noqdaan.
“Waxaan rabaa in dhallinyaradu ogaadaan in halka ay ka soo jeedaan aysan go’aaminayn inta ay le’eg yihiin riyooyinkooda,” ayay tiri.
Sagal waxay xilka kala wareegtay Starmer, oo Holborn and St Pancras ku matalayay Baarlamaanka in ka badan toban sano. Waxay sidoo kale xustay xildhibaankii hore ee geeriyooday, Frank Dobson, oo kursiga hayay ka hor Starmer, iyadoo uga mahadcelisay labadooda kaalintii ay ka geysteen u adeegidda deegaanka iyo dhaxalkii ay jiilasha dambe uga tageen. Waxay sheegtay in noqoshada haweeneydii ugu horreysay ee Holborn and St Pancras ku matasha Baarlamaanka ay tahay “sharaf aan caadi ahayn.”
