Sidee Soomaaliya u xustay sannad-guurada 66-aad ee Ciidanka Xoogga Dalka?

Muqdisho (Dawan) – Soomaaliya ayaa si weyn u xustay sannad-guurada 66-aad ee aas-aaska Ciidanka Xoogga Dalka Soomaaliyeed, iyadoo dowladda ay soo bandhigtay qorshayaal lagu xoojinayo awoodda ciidanka iyo daryeelka qoysaskooda.

Munaasabadda oo ka dhacday magaalada Muqdisho ayaa lagu muujiyay cududda iyo diyaar-garowga Ciidanka Xoogga Dalka Soomaaliyeed, iyadoo cutubyo ka tirsan ciidanka ay sameeyeen dhoollatusyo milatari oo muujinaya tayadooda iyo isku-duubnidooda.

Sannadkan, waxaa markii ugu horreysay bandhigga ka qeyb qaatay diyaaradaha dagaalka ee Turkiga, kuwaas oo dul heehaabay magaalada Muqdisho, taasoo muujinaysa iskaashiga milatari ee sii xoogeysanaya.

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, oo ah Taliyaha Guud ee Ciidamada Qalabka Sida, ayaa ka qeyb galay munaasabadda, isaga oo carrabka ku adkeeyay muhiimadda ay leedahay daryeelka qoysaska askarta.

“Waxaan curinnay in maanta loo istaago agoontii Ciidanka Xoogga Soomaaliyeed iyo dadkii u naafoobay difaaciisa,” ayuu yiri Madaxweynaha.

Si loo xoojiyo dadaalladaas, Madaxweynaha ayaa dhagax dhigay xarun lagu daryeelo agoonta Ciidanka Xoogga Dalka, taas oo la filayo inay bixiso adeegyo waxbarasho iyo daryeel bulsho.

Wasiirka Gaashaandhigga Soomaaliya, Mudane Axmed Macallin Fiqi, ayaa sheegay in dowladda ay qorsheyneyso in xaruntaasi la dhiso oo ay shaqo bilowdo sanadka soo socda.

“Waxaan rajeyneynaa in sanadka soo socda xaruntaasi ay dhisnaato oo ay shaqeyso, si loo daryeelo carruurta ay ka tageen shuhadada,” ayuu yiri Wasiirka.

Intii ay socotay munaasabadda, madaxda iyo saraakiishii hore ee ciidanka ayaa diray fariimo ku aaddan ilaalinta iyo dib-u-dhiska Ciidanka Xoogga Dalka, iyagoo ku baaqay midnimo iyo taageero joogto ah.

Ciidamada Xoogga Dalka Soomaaliyeed ayaa 1980-meeyadii loo aqoonsanaa kuwo ka mid ah kuwa ugu awoodda badan Afrika, balse dagaalladii sokeeye ee dalka ka dhacay ayaa si weyn u saameeyay awooddooda.

Si kastaba, dowladda Soomaaliya ayaa hadda waddo dadaallo dib-u-dhis ah oo lagu xoojinayo awoodda ciidanka, laguna gaarsiinayo heer ay si buuxda ula wareegaan amniga dalka.