Muqdisho (Dawan) — Jaamacadda SIMAD ayaa maanta daahfurtay Shirweynaha 11-aad ee Dhaqaalaha, Siyaasadda Guud iyo Horumarinta Maamulka (CEPAD 2026), oo sanadkan looga hadlay saameynta isbeddellada juqraafiyeed, kala-guurka doorashooyinka iyo sidii loo xoojin lahaa adkeysiga dhaqaalaha.
Shirweynaha oo ay iska kaashadeen Kulliyadda Dhaqaalaha iyo Kulliyadda Cilmiga Bulshada ee Jaamacadda SIMAD ayaa ah madal sanadle ah oo ay ku kulmaan aqoonyahanno, cilmi-baarayaal, masuuliyiin iyo arday.
Hal-ku-dhigga shirweynaha sanadkan ayaa ah: “Saameynta Isbeddellada Juqraafiyeed, Kala-guurka Doorashooyinka iyo Adkeysiga Dhaqaalaha.”
Inta uu socday shirweynaha, ardayda ku jirta heerarka ugu dambeeya ee labada kulliyadood ayaa soo bandhigay cilmi-baaristooda, iyadoo diiradda lagu saarayo arrimaha dhaqaale, siyaasadeed iyo bulsho ee saameynta ku leh Soomaaliya iyo mustaqbalkeeda.
