Soomaaliya oo maxkamado gaar ah u sameyneysa ganacsiga

Muqdisho (Dawan ) – Dowladda Federaalka Soomaaliya ayaa qorsheyneysa in la dhiso nidaam maxkamado oo u gaar ah ganacsiga, si loo xoojiyo qaab-dhismeedka sharciga ee lagu maamulo hawlaha ganacsi iyo maalgelinta dalka.

Qorshahan waxaa iska kaashanaya Wasaaradda Cadaaladda iyo Arrimaha Dastuurka iyo Wasaaradda Ganacsiga iyo Warshadaha, waxaana lagu sheegay inuu yahay tallaabo muhiim ah oo dhiirrigelinaysa maalgashiga gudaha iyo kan caalamiga ah.

Qorshahan ayaa ka dambeeyay kulan ay yeesheen Wasiirka Cadaaladda iyo Arrimaha Dastuurka, Xasan Macallin Maxamuud, iyo Wasiirka Ganacsiga iyo Warshadaha, Jamaal Maxamed Xasan, oo ay wehliyaan khubaro farsamo oo ka socotay labada wasaaradood.

Kulan ayaa diiradda lagu saaray sidii loo dhisi lahaa nidaam sharci oo hufan oo lagu xallin karo khilaafaadka ganacsi ee shirkadaha, isla markaana lagu ilaalinayo xuquuqda maalgashadayaasha.

Labada wasaaradood ayaa isla gartey in Wasaaradda Cadaaladda ay mas’uul ka noqoto dhismaha iyo habraacyada maxkamadaha ganacsi, halka Wasaaradda Ganacsigu ay soo dhameystiri doonto xeerarka iyo nidaamyada ilaalinaya hawlaha ganacsi. Waxaa sidoo kale la qorsheeyay in la sameeyo guddi farsamo oo ka kooban xubno ka socda labada wasaaradood, si ay u diyaariyaan qorshe faahfaahsan oo la xiriira hirgelinta mashruuca.

Mashruucan ayaa muhiim u ah kobcinta kalsoonida ganacsatada iyo maalgashadayaasha, wuxuuna qeyb ka yahay dadaallada dowladda Soomaaliya ee lagu dhisayo nidaam maamul oo casri ah, kana jawaabaya baahiyaha ganacsiga iyo xoojinta dhaqaalaha dalka.