Muqdisho (Dawan) — Wasaaradda Caafimaadka Soomaaliya iyo Jaamacadda Ummadda Soomaaliyeed ayaa kala saxiixday heshiisyo lagu horumarinayo Isbitaalka De Martino si looga dhigo isbitaal waxbarasho iyo cilmi-baaris, iyo in la xoojiyo tababarka xirfadeed ee shaqaalaha caafimaadka. Heshiisyada waxaa kala saxiixday Wasiirka Caafimaadka, Dr. Cali Xaaji Aadan, iyo Guddoomiyaha Jaamacadda Ummadda Soomaaliyeed, Dr. Maxamed Maxamuud Maxamed, sida lagu sheegay war-saxaafadeed ay wasaaraddu soo saartay.
Heshiiska koowaad wuxuu dhigaya in labada dhinac ay iska kaashadaan horumarinta Isbitaalka De Martino, si uu u noqdo xarun lagu bixiyo waxbarashada caafimaadka laguna sameeyo cilmi-baaris. Tallaabadan ayaa lagu doonayaa in lagu taageero tayeynta waxbarashada caafimaadka iyo cilmi-baarista dalka.
Heshiiska labaad wuxuu ku saabsan yahay hirgelinta barnaamijka Master-ka Sare ee Caafimaadka (Executive Master in Health), kaas oo loogu talagalay shaqaalaha ka howlgala wasaaradaha caafimaadka ee heer federaal iyo heer dowlad-goboleed.
