Muqdisho (Dawan)— Soomaaliya ayaa sheegtay in 595 ilood oo biyo ah ay ku jiraan halis sarreysa ama aad u sarreysa oo la xiriirta fatahaadaha ka hor xilliga roobabka Deyrta ee 2026. Saadaasha cimiladu waxay muujinaysaa suurtagalnimada roobab ka badan heerka caadiga ah oo lala xiriirinayo dhacdada cimilo ee El Niño.
Arrintan ayaa lagu sheegay qiimayn ay si wadajir ah u sameeyeen Wasaaradda Tamarta iyo Khayraadka Biyaha Soomaaliya iyo Hay’adda Cuntada iyo Beeraha ee Qaramada Midoobay (FAO), gaar ahaan barnaamijkeeda Maareynta Macluumaadka Biyaha iyo Dhulka Soomaaliya (FAO-SWALIM), taas oo wasaaraddu faafisay maanta oo Sabti ah
Qiimayntu waxay daboolaysay 7,517 ilood oo biyo ah oo muhiim ah, kuwaas oo ku kala yaalla dalka. Ilahaas waxaa ka mid ah ceelasha riigga ah, ceelasha gacanta lagu qodo, biyo-xireennada carrada laga sameeyo iyo berkadaha.
Ujeeddadu waxay ahayd in la aqoonsado kaabayaasha biyaha ee u nugul fatahaadaha, si loo qorsheeyo tallaabooyinka lagama maarmaanka u ah ka hortagga iyo diyaar-garowga.
Sida ku cad qiimaynta, 71 ilood oo biyo ah ayaa ku jira halis aad u sarreysa, halka 524 kalena ay ku jiraan halis sarreysa. Waxaa sidoo kale liiska ku jira 68 ceel-riig oo muhiim ah oo si joogto ah loola socdo. Toban degmo ayaa leh 65% ilaha biyaha ee ku jira labada qaybood ee halista ugu sarreeya, taas oo muujinaysa in khatartu si gaar ah ugu urursan tahay deegaanno cayiman.
Saadaasha cimilada ee Sebtembar 2026 ayaa muujinaysa suurtagalnimo sare oo ah in roobab ka badan heerka caadiga ah ay ka da’aan bartamaha iyo koonfurta Soomaaliya inta u dhexeysa Oktoobar iyo Diseembar. Tani waxay kordhinaysaa walaaca laga qabo fatahaadaha webiyada Jubba iyo Shabeelle, iyo sidoo kale daadadka degdegga ah ee ka dhici kara deegaanno kale.
Qiimayntu waxay degmooyinka Jowhar, Afgooye, Beledweyne, Luuq, Balcad, Xudur, Bu’aale, Rab Dhuure, Bulo Burto iyo Qoryooley u aqoonsatay meelaha mudnaanta koowaad leh marka la qorsheynayo tallaabooyinka ka hortagga fatahaadaha.
