Muqdisho (Dawan) – Hay’adda Qatar Charity ayaa daahfurtay 48 mashruuc oo caafimaad oo qayb ka ah barnaamijkeeda caafimaadka ee sannadka 2026, kuwaas oo ujeeddadoodu tahay ballaarinta adeegyada caafimaadka iyo gaarsiinta daryeel caafimaad bulshada ugu nugul ee ku nool gobollada kala duwan ee Soomaaliya.
Barnaamijka ayaa la filayaa inuu gaaro ku dhowaad 50,000 oo qof, waxaana uu ka kooban yahay adeegyo caafimaad oo kala duwan, sida la-dagaallanka nafaqo-xumada, fulinta qalliinno lagu soo celinayo aragga, daaweynta bukaannada qaba cudurrada wadnaha, bixinta dawooyinka iyo agabka caafimaadka, iyo dib-u-habeynta xarumaha sifeynta kelyaha (dialysis), si loo xoojiyo helitaanka adeegyada caafimaadka ee dalka.
Munaasabadda daahfurka waxaa ka qeyb galay Wasiiru Dowlaha Wasaaradda Caafimaadka iyo Daryeelka Bulshada, Maryan Maxamed Xuseen, Agaasimaha Xafiiska Qatar Charity ee Soomaaliya, Cabdifataax Aadan Macallin, Agaasimaha Hawlgallada Horumarinta Caalamiga ah ee Qatar Charity, Ibraahim Al-Janaaxi, iyo mas’uuliyiin ka socday Wasaaradda Caafimaadka iyo maamulka caafimaadka Gobolka Banaadir.
